اسئلة كتير اوى يا احمد وكل سؤال اصعب من اللى قبله عموما قبل ما اجاوب بدعى ربنا انه يرزقك ببنت الحلال اللى تساعدك على انك تقرب من ربنا وتعينك على دينك وتكون ليك الزوجة الصالحة وخير متاع الدنيا باذن الله عاجل غير اجل
اجابة اسئلتك بقى
ايه مفهومك عن الفرح الإسلامي ؟!
مفهومى انا ولا مفهوم الناس
مفهوم الناس : انه فرح رخم ودمه تقيل وفرح من الاخر سوكيتى وعكننة ومش حنعرف نفرح ولا ننبسط بابننا الوحيد او بنتنا الوحيدة اللى مستنيين فرحها بفارغ الصبر
مفهومى انا : انه احلى فرح فى الدنيا العروسة بتبقى ملكة متوجة الرجالة حتموت وتشوفها عشان تبصلها بصة وحشة او حتى تطلع تقلس على شكلها لكن على مين ماحدش يشوفها ابدا غير المحارم وعريسها ليه وهى رخيصة كل من هب ودب يبص عليها ده غير انه لو فرح عادى وفى اختلاط حتلبس بكم وتلبس طرحة وتدارى وشها بالنقاب طيب وعلى ايه ما البس واتمكيج واعمل شعرى واعيش حياتى بين محارثى وبين النساء قرايبى واهلى وابقى كدة حرة اكتر من غير تقييد وبرده حفرح وحنبسط وامى وكل قرايبى حيهيصولى ويهنونى ويباركولى وانا حكون مرتاحة نفسيا انى برضى ربنا
هل لازم تكون - بالإضافة للفصل - الأناشيد بدف و لا ممكن بإيقاع ولا ايه ؟!
والله انا مش حفتى بس حقول اللى متخيلاه ممكن يكون صح وممكن برده يكون غلط انا اعتقد ان الاناشيد ممكن بدف وممكن بايقاع مدام الكلمات لا نخدش الحياء يعنى فى حاجات دينية كتير اوى جميلة جدا وبتتكلم عن ربنا وعن الرسول وداخل فيها موسيقة والكثير من العلماء اجازوها والكثير ايضا رفضها فا انا هنا بصراحة بحب اطبق موضوع استفتى قلبك مش عارفة كلامى صح ولا غلط بس اهم شئ الكلمات تكون راقية وملتزمة بالاحكام الشرعية
بالنسبة للبنات هل لازم تكوني منتقبة مثلا عشان تعملي فرح اسلامي ولا ايه ؟؟
لا مش مهم اكون منتقبة يكفينى انى اكون مسلمة وارضى ربى فى اول يوم فى حياتى مع زوجى عشان ربنا يباركهالنا ويجعلنا ازواج صالحين لبعض ويرزقنا الذرية الصالحة
ايه رأيكم هل كفاية الشرط الرئسيي وهو الفصل بين الشباب و البنات و بعد كده كل واحد يشغل اللي عايزه و يعمل اللي عايزه ،،،،،، ولا لازم اناشيد ؟؟؟
والله احنا كلنا كلنا وكل الائئمة والعلماء متفقين على ان المعازف حرام والله العروسة عايزة تشغل اغانى فى بيتها بيت مامتها وتشيل هى واهلها الوزر براحتهم او العكس العريس عايز يشغل اغانى ومعازف فى بيت اهله ويشيل هو الوزر لوحده براحته لكن انا لو رجع بيا الزمن بصراحة كنت حعمل فرح اسلامى انفصل انا والبنات اصحابى وقريباتى والبس مايحلو لى سواء بكم ولا نص ولا حتى كات ونصقف ونرقص ونقول اناشيد وعلى فكرة الاناشيد مش وحشة زى البعض ما متخيل دى بقت موضة دلوقتى وكل الناس بتجيب فرق نوبية بتقول اناشيد بالدف وبتبقى حاجة هايلة ورائعة وبيعملوا شو حلو اوى وجو جميل جدا والبنات بتتحنى وبتبقى ليلة جميلة ومريحة وكل بنت بتبقى على راحتها ... والرجال كمان كدة يصقفوا يقولوا اناشيد يقراوا قران يباركوا للعريس ويدعوله يعنى حاجة ظريفة وملمومة كدة
هل حضرت فرح اسلامي قبل كده ؟
اه حضرت
طيب ايه عجبك فيه و ايه مش عجبك ؟
حضرت اكتر من فرح
الفرح الاولانى كان فى قاعة كان حلو جدا بس للأسف شغلوا مع الاناشيد بعد كدة دى جى اغانى عربى واجنبى عملوا ميكس بين الفرح المودرن والفرح الاسلامى وكان سئ جدا جدا جدا ده غير الاختلاط بين الرجال والنساء ويعتبر فرح مش اسلامى لكن هما اطلقوا عليه كدة
الفرح التانى كان فى الجامع الستات فى مصلى السيدات والرجال فى مصلى الرجال وكانوا قاعدين ساكتين كان مش ظريف بصراحة خالص ولا فى اى مظهر من مظاهر الفرح .. ده المفهوم الخاطى عن الفرح الاسلامى
وكان نفسك تضيف ليه ايه لو كان فرحك ؟
اه طبعا لو كان فرحى كنت عملت كل اللى نفسى فيه وغنيت اناشيد ورقصت مع صحباتى وهيصت ده لا عيب ولا حرام وطبعا فى فصل بين النساء والرجال
و بالنسبة للبنات هل تحبي فرحك يكون اسلامي ؟؟؟
كنت اتمنى ان يكون فرحى اسلامى
ولو عايزاه اسلامي ايه تخيلك ليه ؟؟
رديت فوق
ولو رافضين موضوع الفرح الإسلامي ممكن نعرف ليه ؟؟
موافقين طبعا يا فندم ههههههههههههه
و ممكن حضرتك تكوني مصممة و الأستاذ و أهله مش راضيين ساعتها هتعملوا ايه يا ترى ؟؟
ححاول اقنعهم ان الفرح الاسلامى ده حاجة حلوة غير ماهما متخيلين خالص حتى لو حيكون فى اختلاط بين الرجال والنساء فا مش حيكون فيه معازف وحفهمهم ان الفصل بين الرجال والنساء حيخليهم يلبسوا براحتهم ويعملوا اللى هما عيزينه من غير احراج ولا ذنوب وحعرفهم كمان ان الاناشيد دى طالعة موضة والدوف موضة جامدة جدا بدليل الفرق النوبية زى ماسبق وقلت ودى مشهورة اوى فى مصر .... يعنى لانها شرع تبقى وحشة ولانها موضة تبقى حلوة ؟؟
واحاول براحة افهمهم الموضوع واقنعهم ان الفرح حيكون حلو وبرده حيعملوا كل اللى نفسهم فيه وحيفرحوا ببنتهم او ابنهم بس ربنا حيكون راضى عننا بدل مانبدا حياتنا وربنا غضبان علينا والعياذ بالله ويكون معزوم فى فرحنا الملائكة بدل مايكون الشياطين والعياذ بالله هى اللى حاضرة وقاعدة معانا مش كدة ولا ايه ؟؟ وحنهيص وننبسط ونفرح واليلة حتبقى حلوة باذن الله وحتكون احلى وربنا راضى عنا وكدة كدة الناس مبيعجبهاش العجب ولا الصيام فى رجب صح هههههههههههه
يبقى نرضى رب العباد اهم مانرضى العباد لان مهما عملت وقيدت صوابعك العشرة شمع لا يمكن حتعرف ترضى الناس ولا ترضى كل الازواق
اسفة على الاطالة واتمنى اكون وصلتلك وجهة نظرى
جزاك الله خيرا ووفقك لما يحبه ويرضاه ورزقك الزوجة الصالحة والفردوس الاعلى باذن الله
الأربعاء 04 مايو 2011, 6:32 pm
